kabhi kabhi main ye sochta hun ki mujhko teri talash kyun hai

JAVED AKHTAR

kabhī kabhī maiñ ye sochtā huuñ ki mujh ko terī talāsh kyuuñ hai

ki jab haiñ saare hī taar TuuTe to saaz meñ irti.āsh kyuuñ hai

koī agar pūchhtā ye ham se batāte ham gar to kyā batāte

bhalā ho sab kā ki ye na pūchhā ki dil pe aisī ḳharāsh kyuuñ hai

uThā ke hāthoñ se tum ne chhoḌā chalo na dānista tum ne toḌā

ab ulTā ham se to ye na pūchho ki shīsha ye paash paash kyuuñ hai

ajab do-rāhe pe zindagī hai kabhī havas dil ko khīñchtī hai

kabhī ye sharmindagī hai dil meñ ki itnī fikr-e-ma.āsh kyuuñ hai

na fikr koī na justujū hai na ḳhvāb koī na aarzū hai

ye shaḳhs to kab kā mar chukā hai to be-kafan phir ye laash kyuuñ hai

Sharik-e-mahfil-e-dar-o-rasan kuchh aur bhi hain

MOIN AHSAN JAZBI

sharīk-e-mahfil-e-dār-o-rasan kuchh aur bhī haiñ
sitamgaro abhī ahl-e-kafan kuchh aur bhī haiñ

ravāñ-davāñ yūñhī ai nannhī būñdiyoñ ke abr
ki is dayār meñ ujḌe chaman kuchh aur bhī haiñ

ḳhudā kare na thakeñ hashr tak junūñ ke paañv
abhī manāzil-e-rañj-o-mehan kuchh aur bhī haiñ

abhī sumūm ne maanī kahāñ nasīm se haar
abhī to ma.arka-hā-e-chaman kuchh aur bhī haiñ

abhī to haiñ dil-e-shā.ir haiñ saikḌoñ nāsūr
abhī to mo.ajiza-hā-e-suḳhan kuchh aur bhī haiñ

dil-e-gudāz ne āñkhoñ ko de diye aañsū
ye jānte hue ġham ke chalan kuchh aur bhī haiñ

Ye kaun aaya shabistan ke Khwab pahne hue

SAQI FARUQI

ye kaun aayā shabistāñ ke ḳhvāb pahne hue
sitāre oḌhe hue māhtāb pahne hue

tamām jism kī uryāniyāñ thiiñ āñkhoñ meñ
vo merī ruuh meñ utrā hijāb pahne hue

mujhe kahīñ koī chashma nazar nahīñ aayā
hazār dasht paḌe the sarāb pahne hue

qadam qadam pe thakan sāz-bāz kartī hai
sisak rahā huuñ safar kā azaab pahne hue

magar sabāt nahīñ be-sabīl rastoñ meñ
ki paañv so ga.e ‘sāqī’ rikāb pahne hue

Kabhi kisi ko mukammal jahan nahin milta

Film: Ahista Ahista 1981

kabhī kisī ko mukammal jahāñ nahīñ miltā
kahīñ zamīn kahīñ āsmāñ nahīñ miltā

tamām shahr meñ aisā nahīñ ḳhulūs na ho
jahāñ umiid ho is kī vahāñ nahīñ miltā

kahāñ charāġh jalā.eñ kahāñ gulāb rakheñ
chhateñ to miltī haiñ lekin makāñ nahīñ miltā

ye kyā azaab hai sab apne aap meñ gum haiñ
zabāñ milī hai magar ham-zabāñ nahīñ miltā

charāġh jalte hī bīnā.ī bujhne lagtī hai
ḳhud apne ghar meñ hī ghar kā nishāñ nahīñ miltā

Koi ummid bar nahin aati

MIRZA GHALIB

koī ummīd bar nahīñ aatī
koī sūrat nazar nahīñ aatī

maut kā ek din muayyan hai
niind kyuuñ raat bhar nahīñ aatī

aage aatī thī hāl-e-dil pe hañsī
ab kisī baat par nahīñ aatī

jāntā huuñ savāb-e-tā.at-o-zohd
par tabī.at idhar nahīñ aatī

hai kuchh aisī hī baat jo chup huuñ
varna kyā baat kar nahīñ aatī

kyuuñ na chīḳhūñ ki yaad karte haiñ
merī āvāz gar nahīñ aatī

dāġh-e-dil gar nazar nahīñ aatā
bū bhī ai chārāgar nahīñ aatī

ham vahāñ haiñ jahāñ se ham ko bhī
kuchh hamārī ḳhabar nahīñ aatī

marte haiñ aarzū meñ marne kī
maut aatī hai par nahīñ aatī

kaaba kis muñh se jāoge ‘ġhālib’
sharm tum ko magar nahīñ aatī

Be-Qarari si Be-Barari hai

JAUN ELIYA

be-qarārī sī be-qarārī hai
vasl hai aur firāq taarī hai

jo guzārī na jā sakī ham se
ham ne vo zindagī guzārī hai

nighare kyā hue ki logoñ par
apnā saaya bhī ab to bhārī hai

bin tumhāre kabhī nahīñ aa.ī
kyā mirī niiñd bhī tumhārī hai

aap meñ kaise aa.uuñ maiñ tujh bin
saañs jo chal rahī hai aarī hai

us se kahiyo ki dil kī galiyoñ meñ
raat din terī intizārī hai

hijr ho yā visāl ho kuchh ho
ham haiñ aur us kī yādgārī hai

ik mahak samt-e-dil se aa.ī thī
maiñ ye samjhā tirī savārī hai

hādsoñ kā hisāb hai apnā
varna har aan sab kī baarī hai

ḳhush rahe tū ki zindagī apnī
umr bhar kī umīd-vārī hai

Ai mohabbat tere anjam pe rona aaya

SHAKEEL BADAYUNI

Ai mohabbat tire anjām pe ronā aayā
jaane kyuuñ aaj tire naam pe ronā aayā

yuuñ to har shaam umīdoñ meñ guzar jaatī hai
aaj kuchh baat hai jo shaam pe ronā aayā

kabhī taqdīr kā mātam kabhī duniyā kā gila
manzil-e-ishq meñ har gaam pe ronā aayā

mujh pe hī ḳhatm huā silsila-e-nauhagarī
is qadar gardish-e-ayyām pe ronā aayā

jab huā zikr zamāne meñ mohabbat kā ‘shakīl’
mujh ko apne dil-e-nākām pe ronā aayā